Diese Seite soll ein kleines Dankeschön sein für den Mann, der alle diese Seiten Korrektur gelesen hat, mein Herz eroberte und für viele Lachfalten in meinem Gesicht verantwortlich ist.

Vielen Dank Lexi!!!!!

s Schattebäbeli

We d Dante Susi us Paris uf Visite cho isch, het s ganze Huus onder einisch anderscht uusgseh. Ned öppe das me Möbu umgrütscht hät oder neuii Dapetene a d Wand gchleibet... Nä-ä, das hät me ned emou gmacht, wenn dr Chüng persönlech z Visite goude hätti. Aber gliich isch med em Choo vo der Dante Susi eifach nüt me so gsii, wie a angerne Täg. Se hed eso luschtig chönne lache ond giggele, dass Sunne eim sogar bim dickschte Näbu uufgange isch. Osserdäm isch se emmer eso gschnäu dur aui Zimmer gföddelet ond het ou gäng öppis luschtigs z verzöue ha. Ond so isch i jedem Zemmer echly vo ehrem Lache ond em Veieliduft phange blebe wo se emmer omgäh het.

S' Mädeli het gmeint, s Söuber uf äm Büffet glänzi grad vöu häuer aus sösch, wenn d Dante Susi do sigi. Ond Goudrahme um d Böuder, jo sogar d Böuder  säuber gsäche vöu gmüetlecher uus ond öberau sigis schön warm gworde. me het nedemou müesse Angscht ha im Chäuer.

Der Grossvatter hed sech sogar de amigs jede Daag rasiert, so dass s Mädeli sogar am Samschti no gwüsst het, wo äs es Blätzli för sis Gute-Nacht-Möndscheli find ohni sech sis Müüli a de Stacheli aazputsche.

Sogar d Jongfere Resli het es wiise Scheubeli umgha zem Serviere.

Aber am schönschte hets i dere Ziit s Mädeli gha. Im Garte uf em Gigigampfi het ehm d Dante so feschti Schüpf gä, dass äs grad dänkt hed, es flüüg jetzt de glii emou diräkt abem Gampfi i Hemmu ine. Ond de het sinem luschtigi Liedli uf französisch glehrt. Osserdäm   hed sie em Mädeli dasmou sogar es auerliebschts Bäbi med broocht. E sones schöns Bäbi heds Mädeli no nie gha oder gseh.

E schneewiisi Huut ond roseroti Bäggli, blaui Schloofzemmeröigli und ganz vöu Chrüseli. Sogar Mama hets chönne säge, wemmers ofs Büüchli dröckt het. Nomme öppis isch echli gspässig gsi, d Dante Susi het nämlech geseid : " Wenn Du mit die Puppe gehst an der Sonne,  elle est fichu (sie ist kaputt)" Drom ischs Mädeli ou emmer schön am Schatte blebe ond go spaziere. Äs hed däm Bäbi die wiise Liliä onderem Doupeboum ond die blaue Gloggebluemä bi der Grotte zeiget. A dr Sunne hat me die zwee aber nie gseh.

Amene Daag wo d Sunne bsonders schön gschone hed, hed s Mädeli aber dänkt, das chöig doch chem schade ond drom isch es med siim Chindli of em Arm die schönschte Sunnewäg gloffe. S Bäbi het sini groose blaue Schtärnliouge wiit ufgmacht ond sini Höörli händ so wonderschön glänzt i dr Sunne.Was het äch do söue kabott go? Aber uf einisch hed s Bäbi aafo schwetze, zerscht nor chlini Tröpfli ond de gäng ächli grösseri ond ondersmou hend die roote Bäggli am Haus onde ghange. S Mädeli isch so verschrocke ond het wöue die Bäggli weder dööte ha wosi gsi send, aber öberau wos Mädeli drückt hed heds Löcher ond Düpfi gä ond zlegsch hed das schöne Bäby uusgseh wie dr Dod bim Chaschberlitheater.

Do heds Mädeli agfange z gränne ond dicki Dränli send em öber d Bäggli gloffe wos ganz verzwiiflet zur Dante gschpronge isch. Die het numme gseid : " Oh, quel malheur!!" ond heds för si Sunnegwunder e chli gschompfe, aber de hed si Medleid öbercho und hed dem arme Bäbi der Chopf ibunge ond am nöchschte Daag isch sie med em Mädeli ond em Bäbi zum Bädidockter gange ond d Wuche druuf hets Mädeli sis Wachsbäbi weder gha.