Christmas Carol Song

Eseli Lampiohr

Uf ere Weid, ganz i der Nöchi vo Bethlehem, hend es  es paar Schöfli graaset. Es hed ou Geisse, ä Chue ond en Ochs döt ghaa.

En Hertebueb, der Matthias, hed si bewacht ond gsorget, dass si emmer ä schöne Platz ha händ, met saftigem Gras.

Do einisch chunnt a Ma met emene Eseli drhär ond rüeft em Bueb zue: "He Thisli, chumm zue mer! Hesch no äs Plätzli uf der Weid? Dr Grau do isch nümme jong ond i wott ne nümme. Är gseht schlächt ond ghöre chan är ou nömme so rächt. Am Tag pfuuset är ond ir Nacht isch är wach, Laschte mag är keni me träge."

Nenei, schöttle der Bueb dr Chopf: "Was sötti ou mit dem afo? S Fueter längt sowieso nicht so guet zä Schöfli, vier Geisse, dr Ochs ond d Chue - ond jetz no sone schtrubbelige Esel derzu?!"

Do hed das chliine Eseli dr Chopf uf und luegt der Matthias mit grosse, truurige Ouge a, dass dämm ganz kurlig gworde isch ums Härz.

Dr Matthias hets Eseli zwösche de Ohre kräbbelet ond brummlet: "Henusode... de lo ne halt do. Wie gehisst de das armi Tierli?"

Dr Ma isch froh, das är das Grautier los isch gworde, bedankt sech ond seit no: "Ach, dä isch emmer so truurig gsi, i han em eifach Lampiohr gseit, aber am beschte verstoht är, we mer em eis mit de Rute zwickt!"

S Eseli isch zwämgegfahre, so wie wenns verstschtande hät, was der Ma gseit hed. Dr Matthias aber het es Seili gno ond dr Graui uf sini Weid grführt.

Wos Obig isch gworde, hed dr Bueb uf sinder Flöte gschpelt.

Do hend sech alli Tier versammlet, wel si gwüsst händ, dass es jetz hei i Schtall goht.

Numme dr chlii Esel het dr Chopf gsänkt ônd isch truurig bliibe schto. Wär hät ne ou sölle cho hole damit är ou es warms Plätzli gah hät?

Dr Matthias  het sini Flöte iigschteckt ond der Hirteschtab gno ond grüeft:"Hüo! Meck, Bleck, Ochs und Chue. Dr Mond macht sech scho am Himmel uf. Ir Chrüpfe isch Salz ond Heu ond Schtrou heds am Bode. Dr Bless ond s Büsi send ou scho dinne!"

D Tierli händ sech drängt zur Töre, numme s Eseli isch no emmer truurig dogschtande ond het nocheglueget. Dr Matthias het sich umkehrt ond isch sälber ganz truurig gworde, wels chliine Eseli kei Platz meh het ka im Schtall.

Wos Eseli so ganz allein isch gsi hets agfange rüefe. Sis "i-ah" isch so luut ond truurig gsi, aber andersch het das Eseli sini Truurigkeit ned chönne metteile.

Do plötzlech isch es Lichtgschtalt vor em gschtande. Do isch es aber verchlöpft, das arme Eseli! Aber dä Ängel het mit em gred: "i bruche fürs Jesuschindli, für die chalti Nacht, es Esseli wo ins wärmt und wacht..."

s Lampiohr het dä Ängel aagschtuunet ond de ganz truurig de Chopf gschüttlet: " I bi für nüd meh guet, mis Fäli isch schtrubbelig, eis Oug isch blind, träge chan i ou nümme, i bi ned guet gnue fürs Jesuschindli."

Do het dr Ängel glachet ond geseid:

Du, Lampiohr, es wird, dass Du widder gsehsch..." Ond der Ängel het lieb öber em Eseli sin Chopf gschriechlet.

Lampiohr het ufbrüelet:"I-ah, i gseh Schtärne! I-ah! I wörd gärn alles für das Chindli tue!"

Wider het dr Ängel glächlet. Ganz lislig her är dr Finger ufs Muu gleit ond gseit: "So söll es sii. Numme darfsch jetz nömme so luut brüele. Vo jetz a söll Dir ou niemerd meh Lampiohr säge, sondern alli Wält wird Dech kenne als Eseli im Schtall bim Jesuschind"

Dr Ängel nimmts Eseli am Halfter ond führts i Schtall wo Maria ond Josef bim Chind gsi sind wo bettet gsi isch im Heu vo der Chrüpfe"